2011/09/12
2011/09/07
2010/01/06
Alemaniako unibertsitateak okupatuta
Berlingo Unibertsitate Libreko 1-A auditoriuma izan da Silberlaube eraikin nagusiko gelarik erabiliena azken bi hilabetotan. Eta ez da bertan eskaintzen diren klase edo mintegiengatik; ikasleek euren espazio askea sortu nahi izan dute Unibertsitate “Askearen” baitan, eta okupatuta daukate azaro hasieratik, Austrian hasi eta iparralderantz hedatutako protesta-olatuarekin bat eginik.
“McBachelor” bezalako leloen pean (“bachelor” Bolonia ondorengo lizentziaturek hartu duten izena da), etenik gabe ari dira gradu berrien erreforma hobeago baten alde lanean: ikasle mota guztiei goi mailako ikasketak baimenduko dizkien sistema bat dute aldarri, oztopo ekonomiko, sozial edo ikasketak amaitzeko epe mugaturik gabe, eta unibertsitateen arteko mugikortasuna benetan erraztuko duena.
“Oso pozik gaude jasotako erantzunarekin, batez ere ikaskide eta zenbait irakasleren aldetik” dio bertako ikasle den Samara Velte blogari zarauztarrak, “eta zuzendaritzarekiko harremana ere aurrera doa pixkanaka-pixkanaka: zaila da, baina negoziatzeko gogoz gaude.”
Beste zenbait unibertsitateetan ez bezala, FU-ko zuzendaritzak adierazi du ez duela asmorik auditoriuma indar polizialez husteko. “Oporretan geure kontura utziko genuela usteko zuten, seguruenik” dio beste ikasle batek irri batekin, “baina gabonak ere hemen ospatu genituen 10 bat lagunek; ikaskide baten gurasoek prestatu ziguten afaria. Oso pozik gaude lortutakoarekin. Hala ere,” gehitu du pentsakor “geroz eta jende gutxiago agertzen da auditoriumean gaua pasatzera, eta betiko lau katuok gabiltza kontua aurrera eramaten; hasierako elkartasuna behar dugu horretan ere.”
Hala ere, baikor dira ikasleak: okupaziok bizirik darrai, hori erakusten dute asteroko pleno eta asanbladek. Egunean zehar lan-talde desberdinek lanean jarduten dute unibertsitatearen egunerokotasunean topa daitezkeen oztopoak detektatu eta konpontzeko (besteak beste, greba eta okupazioaren helburu eta aldarrikapenak zehaztea, beste unibertsiateekiko harremanak lotzea eta sexismoaren aurkako kanpaina efektibo bat eraikitzea).
Austria eta Alemanian zehar 60 unibertsitate eta eskolatik gora egon dira okupatuta azken hilabeteotan, eta AEB, Londres, Paris eta Kroaziatik ere iristen dira elkartasunezko mezuak. Internetek berebiziko garrantzia izan du honetan; Berlingo unibertsiateak bakarrik ez, protesta-mugimendu osoa jarrai baitaiteke euren webgunean edo Twitter kontuan.
FU-ko ikasleak auditorium okupatuan asanbladan
Nafarroako Golgota, injustiziak jota
Montoiaren liburu batekin maitemindu nintzen literaturaz. Ordu arte ez nuen ezer leitzen, ez neure gustura behintzat, eskolan derrigortutako liburuak ez 
baziren.
16-17 urte izango nituen. Zarauzko liburutegira joan eta apalategietan begira egon ondoan, Non dago Stalin? liburua aukeratu nuen. Xabier Montoiarena. Ez dakit liburuaren azalak erakarri ninduen edo izenburuak, baina liburu hura irakurtzen hastean sentitu nituen lehen literatur bihozkadak.
Ordutik sarri jotzen dut Montoiarengana bihozkada bila. Eta eskatua itzultzen dit ia beti, bai musikan eta bai literaturan, izan poesian, izan nobela-ipuinetan. Beste hainbeste diot liburu honi buruz ere. Kontakizun korapilotsua korapilotu gabe, euskara ederrean, historia gorria azaltzen duen istorio nafarra da Golgota: minaren, herraren, amesgaiztoen gainean eraikia. Iruñeako etorbideak eta jendea hobeto ezagutzeko eta ulertzeko literatuta ederra. Ankerra.
Xabier Montoia poema bat errezitatzen entzuteko egin klik hemen!
Masterra lasterra izaten ari da
Multimedia komunikazioa izeneko masterra aurrera doa. Eta jadanik bide erdia egin dugula esan liteke. Hasiera batean urrun ikusten genuen bi mila eta hamarra. Baina heldu da, eta hasiera baino, amaiera ikusten dugu gertuen. Orain lanak egitea dagokigu. Eta horretan ari gara. Ez da akaso notizia izango hori zuentzat baina masterra atera nahian gabiltzanontzat bai.
Urriaren 5ean izan genuen EITBko eraikinean Multimedia Komunikazioa Masterrari buruzko hasiera ekitaldia. Ordutik zapar ederrak bota baditu ere orokorrean lan erritmo egokia eta goxoa izan dugula ezin ukatu. Irakasle bakoitzaren jarduna laburra izan da oso eta akaso hor egon da gabeziarik handiena, hasi bezain pronto bukatzen zirelako saioak. Eta gai asko ikusi ditugun arren, ez dugu nahi bezain beste sakondu, hori geure gain geratu da. Eta geratuko. Bidea erakutsi zaigu. Ibiltzen ere bai. Bidea egitea dagokigu orain.
2009/12/01
Masterra. Multimedia. Komunikazioa ikasten. Berrikasten
Multimedia masterra komunikazioan. Horretan ari gara eta klasetik gaur podcasta blogeratzen saiatuko gara. Aurreko ikasturtean Arraioenean grabatutako irratsaio bat duzue entzungai hemen. Gustuko izango duzuelakoan…
Bada ez, huts egin du ahaleginak. Zergatik ote? Hurrengo astean emango duzu misterioaren berri.
2009/11/22
Multimedia komunikazioa masterra langai: bigarren bloga
Geneukana nahikoa ez, masterrean sortu genuen beste blog hau nahikoa ez eta beste blog bat sortu behar izan dugu Multimedia komunikazioa masterrean. Oraingoari Panpina ustela jarri diot izena, batez ere literaturaz arituko den bloga izatea nahi duelako. Baina batek daki zer emango duen! Dena denm inork bloga jarraitu nahiko balu badaki non zer irakurri.
